Bugun Sankt-Peterburgda Mustaqil Davlatlar Hamdo'stligi a'zolarining liderlari norasmiy sammit o'tkazib, yakunlanayotgan yil yuzasidan o'z xulosalarini o'rtoqlashdi.
Rossiya prezidenti Vladmir Putin, Qozog'iston prezidenti Qosim-Jo'mart To'qayev, O'zbekiston prezidenti Shavkat Mirziyoyev, Tojikiston prezidenti Emomali Rahmon, Qirg'iziston prezidenti Sadir Japarov, Turkmaniston prezidenti Sedar Berdimuhamedov, Ozarbayjon prezidenti Ilhom Aliyev, Armaniston Bosh vaziri Nikol Pashinyan va Belarus prezidenti Aleksandr Lukashenko bir davrada o'tirib, MDH kelajagini muhokama qildi.
Rasmiylarga ko'ra, bu organ doirasida hamkorlik mustahkam va biror a'zo kelajakka shubha bilan qaramaydi, chunki o'zaro manfaatlar asosida birga ishlash to'g'ri yo'l ekanini tushunadi. Shu mazmundagi gaplarni MDH liderlarining o'zlari ham bugungi majlisda aytgan.
Xavfsizlik, savdo, energetika, madaniy rishtalar qatorida global masalalarda bir yoqadan bosh chiqarish ham prioritet deya qayd etilgan.
Bugun oliy martabali mehmonlar mezbon shahar Sankt-Peterburgni aylandi.
Prezident Putin hamrohligida sobiq sovet davlatlarining rahbarlari "buyuk rus imperiyasi" davridan qolgan saroylarda bo'ldi, jumladan “Pavlovsk”, “Sarskoye selo” va “Petergof” muzey-qo‘riqxonalarida.
Bu inshootlar XVIII-XIX asrlarda qurilgan va hozirda UNESCO Butunjahon merosi ro‘yxatida.
MDH 1991-yilning oxirida, SSSR tarqalib ketishi ketidan tuzilgan. Moldova uni tark etgan.
O'zbekiston hukumatiga ko'ra, respublikaning hamdo'stlik doirasidagi iqtisodiy loyihalar portfeli 30 milliard dollardan oshgan va deyarli barcha tarmoqlarni qamraydi.
