2006-yildan beri panjara ortida o'tirgan inson huquqlari faoli A'zam Farmonov 3-oktabr kuni Jasliq koloniyasidan ozod etildi. Farmonov tovlamachilikda ayblanib, qariyb 10 yilga qamoq jazosiga hukm qilingan edi. 2016-yilda ichki tartibni buzgan deya bu muddat yana besh yilga uzaytirilgan edi.
BMT rasmiy delegatsiyasi Toshkentga tashrif buyurgan paytda siyosiy mahbus erkinlikka chiqarilgani Prezident Shavkat Mirziyoyev va u boshliq tuzum tomonidan qo'yilgan strategik qadam deya baholanmoqda.
Prezident Mirziyoyev yaqinda BMT minbarida so'zlaganida O'zbekiston inson huquqlari e'zozlanadigan, adolatli jamiyat qurishga bel bog'lagan, deya qayd etgan edi.
AQSh Farmonovning ozod etilganini olqishlab, bu yangilik Muhammad Bekjonov, Murod Jo‘rayev, Erkin Musayev, Jamshid Karimov va boshqa vijdon tutqunlari singari qo'yib yuborilgani xush xabar, deya bayonot berdi.
G'arb rasmiylari deydiki, o'tgan bir yil ichida bir necha siyosiy mahbus qamoqdan uyiga qaytgani progress desa arzigulik voqealardir.
AQShning Toshkentdagi elchixonasi kelgusida boshqa mahbuslar ham ozod etiladi va fuqarolik jamiyatiga yo'l ochilaveradi, degan umidda.
"Human Rights Watch" va Xalqaro Amnistiya kabi xalqaro inson huquqlari tashkilotlari A’zam Farmonov asossiz qamalgan va darhol ozod etilishi kerak deya undab kelar edi. 2013-yilda BMT Qiynoqlarga qarshi komissiyasi ham Farmonovni ozod etishga chaqirgan edi.
O'zbekistonda siyosiy, ijtimoiy va inson huquqlari borasidagi islohotlar boshlangani o'ta ijobiy o'zgarish, deydi xalqaro huquqbonlar, jarayon keng ko'lamda davom etishi kerak.
Facebook Forum